Sunday, March 10, 2013

கவிஞர் புவியரசு அவர்களுடன் ~ 10.03.13 ~ ஞாயிற்றுக்கிழமை



கோவையிலுள்ள பூ.சா.கோ.பொறியியல் கல்லூரியில் 2012 ம் ஆண்டிற்கான சாகித்ய அகாதெமி விருது பெற்ற 'தோல்' நாவலின் நூலாசிரியர் டி.செல்வராஜ் அவர்களுக்கு விஜயா பதிப்பகம் மற்றும் தமிழ்நாடு முற்போக்கு எழுத்தாளர்கள் சங்கத்தின் சார்பில் பாராட்டு விழா நடைபெற்றது.இந்த விழாவில் சிறப்பு விருந்தினாராக எனது ஆருயிர் நண்பர் கவிஞர் புவியரசு அவர்களும் கலந்துகொண்டார்கள்.நமது கிராமத்து வலைப்பூவிற்காக அவருடன் புகைப்படம் எடுத்துக்கொண்டேன். 

உலகநாயகன் பத்மஸ்ரீ.கமல்ஹாசன் அவர்களின் நெருங்கிய நண்பர்.2009 ம் ஆண்டில் இவருடைய "கையொப்பம்" என்ற கவிதை தொகுப்பிற்காக சாகித்ய அகாதமி விருது கிடைத்தது.2003 ம் ஆண்டு கோவையிலுள்ள பாரதிய வித்யா பவனில் நடைபெற்ற பாரதி விழாவில் இவரை நான் சந்தித்து அறிமுகம் செய்துகொண்டேன்.அப்போதுதான் நான் முதுகலை பாடப்பிரிவில் மாணவராக படித்துக்கொண்டிருந்தேன்.கோவையிலுள்ள அரசு உயர் நிலைப்பள்ளியில் ஆசிரியாராக பணியாற்றி ஓய்வு பெற்றவர். இவருடைய "மிர்தாத்தின் புத்தகங்கள்" என்ற மொழிபெயர்ப்பு நூல் ஒரு லட்சம் பிரதிகளை தாண்டி விற்பனையாகிக் கொண்டிருக்கிறது.
மிகச்சிறந்த மேடைபேச்சாளர்.

கடந்த 10 வருடங்களாக எனக்கு பல இக்கட்டான தருணங்களில் சிறந்ததொரு வழிகாட்டியாக இருந்துகொண்டிருக்கிறார். இவருடைய இல்லத்திற்கு பலமுறை சென்றிருக்கிறேன்.5000 த்துக்கும் மேற்பட்ட புத்தகங்களை வீட்டில் அவருடைய அலமாரியில் இருக்கும்.லட்சக்கணக்கான ரூபாய் மதிப்புள்ள புத்தகங்கள் ஒரு பெரிய நூலகம் போன்று காட்சியளிக்கும்.அவர் என்னிடம் சொல்லுவார் - நான் தம்பி இரவு நேரங்களில் பிசாசு போன்று படித்துக் கொண்டிருப்பேன் என்று நகைச்சுவையாக சொல்லுவார். இவருடைய   முதுமை பிராயத்திலும் வெறித்தனமான புத்தக வாசிப்பைக் கண்டு நான் மிரண்டு போயிருக்கிறேன்.அகில இந்திய அளவில் எழுத்துத் துறையில் முத்திரை பதித்தவர்.சாகித்ய அகாதெமி தேர்வுக்குழுவில் உறுப்பினராக பணியாற்றியவர்.

என்னுடைய புத்தக வாசிப்புக்கும்,எழுத்துக்கும்,மேடை பேச்சுக்கும் உற்ற ஆலோசனைகளை நான் கேட்கும்போதேல்லாம் அலைபேசியில் இரத்தின சுருக்கமாக பதில் சொல்லுவார்.நமது கிராமத்து இணையதளத்தை வாரத்திற்கு ஒருமுறை பார்த்துவிட்டு பாராட்டுவார்.சில திருத்தங்களை சொல்லுவார்.அவருடைய ஊக்கமும்,பாராட்டும் என்னை ஒவ்வொரு நாளும் மெருகேற்றிக்கொண்டே,சிற்பமாக செதுக்கிக்கொண்டே இருக்கிறது.




No comments:

Post a Comment